Эканамічны суд Гродзенскай вобласці 29 верасня прызнаў абутковую фабрыку «Нёман» неплацежаздольнай і ўвёў санацыю на тры гады. За гэты час прадпрыемства павінна аднавіць плацежаздольнасць і наладзіць разлікі з крэдыторамі. Згодна з рашэннем суда, на канец ліпеня на фабрыцы налічвалася 126 супрацоўнікаў — на 62 менш, чым на момант падачы заявы аб неплацежаздольнасці.
Рашэнне апублікавана ў Адзіным дзяржаўным рэестры звестак аб банкруцтве.
Што азначае санацыя для фабрыкі
Санацыя — працэдура фінансавага аздараўлення прадпрыемства. Яе мэта — аднавіць здольнасць кампаніі выконваць свае фінансавыя абавязацельствы, забяспечыць яе працу і разлікі з крэдыторамі.
Для «Нёмана» суд вызначыў тэрмін у 36 месяцаў — да 29 верасня 2029 года. Пры прадугледжаных законам падставах санацыя можа завяршыцца раней.
План аздараўлення ўзгаднілі Гродзенскі гарвыканкам і сход крэдытораў. Антыкрызісным кіраўніком прызначана юрыдычная кампанія «Ваш эксперт». Яна павінна не радзей за адзін раз на квартал даваць справаздачу камітэту крэдытораў пра ход санацыі, фінансавы стан фабрыкі і пагашэнне патрабаванняў.
Колькасць работнікаў скарацілася амаль на траціну
На дзень падачы заявы аб неплацежаздольнасці штатная колькасць работнікаў фабрыкі складала 188 чалавек. З іх восем знаходзіліся ў адпачынку па доглядзе дзіцяці да трох гадоў.
На 30 ліпеня 2026 года на прадпрыемстве налічвалася ўжо 126 супрацоўнікаў, у тым ліку дзевяць чалавек у сацыяльным адпачынку.
Дзяржаве на пачатак 2026 года належала 59,64% акцый фабрыкі. Асноўны дзяржаўны акцыянер — Гродзенскі гарвыканкам. Доля фізічных асоб складала 40,36%.
Крэдыторы прад’явілі патрабаванні на 3,29 млн рублёў
Па стане на 30 ліпеня кіраўніку прад’явілі 44 патрабаванні крэдытораў на агульную суму каля 3,29 млн рублёў.
Пры гэтым інвентарызацыя паказала, што ў фабрыкі былі актывы на 13,59 млн рублёў. Сярод іх:
- асноўныя сродкі — 7,24 млн рублёў;
- матэрыялы, гатовая прадукцыя і незавершаная вытворчасць — 2,68 млн;
- дэбіторская запазычанасць, то-бок даўгі перад самой фабрыкай, — 884 тысячы;
- грошы на разліковым рахунку — 159 тысяч;
- іншыя актывы — 2,63 млн рублёў.
Паводле вынікаў ацэнкі кіраўнік вызначыў ступень рызыкі банкруцтва прадпрыемства як сярэднюю.
Як плануюць аздаравіць «Нёман»
План санацыі прадугледжвае чатыры напрамкі: умацаванне фінансавай стабільнасці, аптымізацыю бягучай працы, развіццё паслуг і выпуску гатовага абутку, а таксама тэхналагічную мадэрнізацыю.
Да канца 2029 года фабрыка плануе давесці выручку да 7,42 млн рублёў, а гадавы прыбытак ад рэалізацыі — да 1,1 млн рублёў.
За тры гады прадпрыемства разлічвае аднавіць плацежаздольнасць, забяспечыць абслугоўванне або пагашэнне існых даўгоў і выйсці на ўстойлівую працу.
Фабрыка ўжо не першы год мае фінансавыя цяжкасці
Пра праблемы «Нёмана» гаварылі яшчэ ў 2015 годзе, калі прадпрыемства называлі такім, што знаходзіцца ў перадбанкрутным стане. На складах тады назапасіліся вялікія запасы прадукцыі, а фабрыка спрабавала прадаць частку сваіх актываў.
У 2022 годзе «Нёман» перадалі пад кіраванне кампаніі «Белвест». Меркавалася, што прадпрыемства засяродзіцца на выпуску дзіцячага абутку, павялічыць аб’ёмы вытворчасці ў два-тры разы і стане буйной вытворчасцю для Гродна. Аднак у 2025 годзе фінансавыя цяжкасці ўзніклі і ў самога «Белвеста».
Мяркуючы па дакументах, у апошнія гады ў фабрыкі зніжалася выручка, а даўгі раслі. У 2025 годзе значную частку запазычанасці складалі рахункі за электраэнергію, цяпло, ваду і паліва. Сярод буйных крэдытораў таксама значыцца «Белінвестбанк» — доўг па працэнтах па трох крэдытных дагаворах перавышае 1 млн рублёў.
11 мая 2026 года суд прыняў заяву фабрыкі аб прызнанні яе неплацежаздольнай, адкрыў вядзенне справы і ўвёў ахоўны перыяд да 1 чэрвеня.
З 1 чэрвеня пачалася конкурсная вытворчасць. На гэтым этапе кіраўнік вывучаў фінансавы стан прадпрыемства, выяўляў маёмасць і рыхтаваў план санацыі.
Улетку гэтага года фабрыка здавала ў арэнду свае цэхі ў будынку на вуліцы Савецкіх Пагранічнікаў, 95. Патэнцыйным арандатарам былі даступныя гатовыя цэхі з захаваным абсталяваннем для абутковай вытворчасці, а таксама плошчы пад краму на першым паверсе. Аб’ява аб арэндзе, мяркуючы па ўсім, актуальная і цяпер.
