У Бераставіцы 38 навучэнцаў каледжа з пачатку верасня жылі ў інтэрнаце, дзе адначасова ішоў рамонт. Пакоі на пятым паверсе былі непрыдатныя для пражывання: з пашкоджанымі сценамі, падлогай і сантэхнікай. Парушэнні выявіла пракуратура Бераставіцкага раёна і ўзяла сітуацыю пад кантроль.
Пракуратура высветліла, што на пятым паверсе інтэрната ішоў рамонт, хоць там ужо жылі навучэнцы. Такія работы нельга праводзіць, калі яны могуць пагражаць іх жыццю і здароўю.
З 7 верасня на гэтым паверсе жылі 38 навучэнцаў каледжа, у тым ліку непаўналетнія.
У пакоях былі пашкоджаныя сцены, падлога і сантэхніка. Пракуратура прызнала іх непрыдатнымі для пражывання.
Пракуратура запатрабавала ліквідаваць парушэнні і прыцягнуць вінаватых да адказнасці. Сітуацыю ўзялі пад кантроль.
Ці перасялілі навучэнцаў і дзе яны жывуць цяпер, у паведамленні не ўдакладняецца.
Што каледж піша пра інтэрнат
У Бераставіцы працуе адзін каледж — Бераставіцкі дзяржаўны каледж. Мяркуючы па ўсім, гаворка ідзе менавіта пра яго інтэрнат, аднак пракуратура назву ўстановы не ўказвае.
На сайце ўстановы гаворыцца, што інтэрнат мае блочную сістэму. У кожным блоку знаходзяцца два двухмесныя пакоі, санвузел і ванная. На паверхах ёсць кухні, пакоі для самападрыхтоўкі і адпачынку.
Таксама паведамляецца, што ў інтэрнаце ўсталяваныя сістэмы відэаназірання і пажарнай бяспекі, а навучэнцы пры засяленні праходзяць інструктаж па тэхніцы бяспекі.
На старонцы каледжа асобна адзначаецца: «Разумеючы важнасць пытання добраўпарадкавання інтэрната, кіраўніцтва каледжа надае яму максімум увагі».
Кошт пражывання ў інтэрнаце, паводле інфармацыі на сайце каледжа, складае 8,40 рубля на месяц.
