Мінулая снежная і марозная зіма дагэтуль дае пра сябе ведаць. У Гродзенскай вобласці анамальныя халады сур’ёзна пашкодзілі плантацыі лахіны: у некаторых гаспадарках страты ўраджаю дасягаюць 90%. Адзін з фермераў распавёў, што страціў 84% ураджаю і каля 7 тысяч кустоў. На аднаўленне плантацыі спатрэбіцца некалькі гадоў. Праблемы фермеру прынеслі і анамальна гарачыя дні — кусты лахіны сохнуць і «стрэсуюць».
Фермер з вёскі Асташа Гродзенскага раёна Раман Салкевіч вырошчвае лахіну ўжо 11 гадоў. Паводле яго слоў, гэты сезон стаў самым цяжкім за ўвесь час працы.
Праз моцныя маразы, якія былі мінулай зімой, гаспадарка страціла 84% ураджаю. Замест чаканых 12–15 тон ягад удасца сабраць каля адной тоны, распавядае ТРК «Гродна».
«За 11 гадоў гэта адзін з самых адчувальных удараў. Спачатку мароз, потым град і спёка. Ягаду не так шкада, як кусты», — кажа фермер.
Паводле яго слоў, каля 2,5 тысячы кустоў загінулі цалкам, а яшчэ прыкладна 7 тысяч моцна пакутавалі ад маразоў — іх давядзецца замяніць.
«Страты сапраўды каласальныя. Гэтыя кусты ў мінулым годзе ўжо пладаносілі і давалі па 300–500 грамаў ягад, а цяпер іх давядзецца цалкам перасаджваць», — распавёў Раман Салкевіч.
На аднаўленне спатрэбіцца некалькі гадоў
Наследкі маразоў гаспадарка будзе адчуваць яшчэ доўга. Маладыя кусты пачынаюць паўнавартасна пладаносіць толькі праз некалькі гадоў, таму аднаўленне плантацыі адкіне гаспадарку прыкладна на тры-чатыры гады таму.
Восенню на месцы загінулых раслін высадзяць новыя кусты. Для гэтага фермер выкарыстоўвае уласны пасадачны матэрыял, які вырошчвае ў гадавальніку.
«Пасадачны матэрыял у нас свой. Будзем дасаджваць загінулыя кусты і паступова аднаўляць плантацыю сваімі сіламі», — кажа ён.
Цяпер у гаспадарцы ўжо ўкаранёўваюць новыя саджанцы сорту «Блюкроп», які лічыцца адным з самых распаўсюджаных і ўстойлівых у свеце.
Спёку лахіна таксама перанесла цяжка
Пасля марознай зімы выпрабаваннем для раслін стала летняя спёка. Паводле слоў фермера, пры тэмпературы каля +38 °C кусты «стрэсуюць» і практычна перастаюць расці. Вярнуць да жыцця і выратаваць пасадкі дапамагае кропельны паліў. Вады трэба шмат: цяпер лахіна займае каля 11 гектараў і паліваць яе трэба часта.
Нягледзячы на складны сезон, Раман Салкевіч плануе працягнуць пашырэнне плантацый і аднавіць загінулыя пасадкі ўжо гэтай восенню.
