Кіроўца прыватнай маршруткі Мінск — Слонім адмовіўся бясплатна везці 16-гадовага падлетка з інваліднасцю і, паводле словаў яго маці, абразіў яго. Бясплатны праезд дзецям з інваліднасцю даў уладальнік транспартнай кампаніі. Падобны канфлікт з гэтым жа кіроўцам адбыўся ўжо другі раз, паведамляе «Слонімскі веснік».
Што адбылося
Пра канфлікт маці падлетка расказала ў адной з сацыяльных сетак. Паводле яе словаў, кіроўца адмаўляўся бясплатна везці сына з Мінска і дазволіў сабе абразы ў яго адрас.
У канцы размовы кіроўца сказаў хлопцу: «Табе мала засталося ездзіць». Гэтыя словы пакрыўдзілі падлетка.
Маці расказала, што падобная сітуацыя адбылася ўжо другі раз. Раней гэты ж кіроўца нібыта хацеў высадзіць яе сына з маршруткі.
Чаму падлетак ездзіць бясплатна
Уладальнік прыватнай транспартнай кампаніі, якая выконвае гэтыя рэйсы, даў дзецям з інваліднасцю права бясплатнага праезду ў аўтобусах фірмы, у тым ліку на міжгародніх маршрутах.
Паводле словаў жанчыны, да кіраўніка кампаніі ў сям’і прэтэнзій няма. Пытанні ўзніклі толькі да паводзінаў кіроўцы, які не хацеў даваць падлетку бясплатны праезд і груба з ім размаўляў.
Што адказаў кіроўца
Кіроўца патлумачыў, што не хацеў браць на сябе адказнасць за жыццё і здароўе непаўналетняга пасажыра. Ён лічыў, што падлетак павінен ехаць у суправаджэнні дарослага.
Фразу «Табе мала засталося ездзіць» кіроўца патлумачыў тым, што пасля дасягнення 18 гадоў малады чалавек страціць дадзенае кампаніяй права на бясплатны праезд. Паводле яго словаў, ніякага іншага сэнсу ён у гэтыя словы не ўкладваў.
Кіраўнік транспартнай кампаніі асабіста папрасіў прабачэння ў падлетка і яго сям’і. Ён таксама запэўніў, што падобныя сітуацыі больш не паўторацца.
Сітуацыю абмяркоўвалі мясцовыя жыхары
Гісторыю актыўна абмяркоўвалі жыхары Слоніма ў гарадскім пабліку. Некаторыя каментатары патрабавалі назваць імя кіроўцы і кампанію, у якой ён працуе.
Пры гэтым частка карыстальнікаў адзначала, што паводзіны аднаго супрацоўніка не павінны ўплываць на рэпутацыю ўсяго перавозчыка.
«Пры чым тут фірма, калі няварта паводзіць сябе кіроўца», — напісала адна з удзельніц абмеркавання.
Іншая каментатарка расказала, што рэгулярна карыстаецца паслугамі кампаніі і раней не сутыкалася з падобнымі праблемамі.
«Вельмі добрая фірма, заўсёды карыстаюся яе паслугамі і хачу выказаць словы падзякі дырэктару фірмы Лазару В. І. за магчымасць для дзяцей з інваліднасцю бясплатна карыстацца праездам на транспарце. Ніколі не ўзнікала праблем з кіроўцамі», — напісала яна.
Некаторыя карыстальнікі прапанавалі адправіць кіроўцу на навучанне правілам зносінаў з пасажырамі.
«Адпраўце кіроўцу на курсы па этыцы зносінаў з людзьмі, а лепш усіх кіроўцаў, каб больш не ўзнікала падобных сітуацый», — напісала адна з каментатарак.
Былі і крытычныя водгукі пра працу перавозчыка. Адзін з карыстальнікаў заявіў, што праблема датычыцца не толькі ўдзельніка гэтага канфлікту.
«У гэтай фірме большасць кіроўцаў паводзяць сябе жахліва толькі таму, што няма канкурэнцыі з боку іншых кампаній. Калі б, напрыклад, Atlas пачаў пастаянна вазіць, то гэтая фірма са сваімі недакіроўцамі адпачывала б», — напісаў каментатар.
